Nis rritja e euros, kapërcen 122 lekë. Çfarë pritet të ndodhë në vijim

Pas rënies së fortë muajt e fundit, për shkak edhe të prurjeve valutore nga turistët dhe emigrantët, euro ka nisur revanshin. Sipas kursit të Bankës së Shqipërisë, monedha europiane po shkëmbehet me mbi 122.1 lekë, duke fituar 0.13 lekë kundrejt një dite më parë. Ndërsa gjatë javës së fundit, euro ka fituar rreth 1 lek.

Forcimi i monedhës europiane po ndodh për shkak të përfundimit të mbarimin e efekteve sezonale. Kjo prirje pritet të vazhdojë deri në fund të dhjetorit, atëherë kur efektet do të shfaqen sërish, me emigrantët që kthehen në atdhe për festat e fundvitit. Por për ekspertët, pavarësisht këtij forcimi të pritshëm, monedha e Eurozonës nuk do të kalojë nivelin e 123 lekëve.

“Euro do të rritet sepse faktorët që e ulin, sidomos prurjet e turistëve, janë drejt ezaurimit të tyre.

Besoj se mund të shkojë qetësisht deri në kuotën 123, dhe të rrijë aty deri në mars”, shprehet Fatos Çoçoli, ekspert për ekonominë për A2 CNN.

Përveç euros, ditët e fundit ka nisur forcimi edhe i monedhave të tjera kundrejt lekut shqiptar. Sipas kursit të Bankës së Shqipërisë, dollari është në kuotën e 110.2 lekëve, me rritje 0.23 lekë kundrejt një dite më parë. Në pozita më të forta qëndrojnë edhe paundi britanik, franga zvicerane, dollari kanadez etj.