LIGJET E BIZNESIT
Gazetari i njohur, Ylli Rakipi ka dhënë detaje rreth një darke që sipas tij, kryeministri Edi Rama ka zhvilluar me pronarin e TV Klan, Aleksandër Frangajn dhe gazetarin Blendi Fevziun.
Sipas Rakipit darka mes të treve është konsumuar në një nga restorantet më luksoz në kryeqytet më 8 prill 2019.
Në intervistën e tij në RTV Ora, Rakipi u shpreh se kryeministri Edi Rama i ka bërë presion drejtuesit të emisionit “Opinion”, duke i kërkuar që të mos ftojë në studio përfaqësuese të opozitës së re parlamentare, pasi dëmtojnë reputacionin e mazhorancës me nivelin e tyre mediokër.
“I ka bërë presion edhe kolegut tonë, Blendi Fevziut. I ka kërkuar të mos ftojë më në studio përfaqësues të opozitës së re”, deklaroi Rakipi. “E keni pare se çfarë niveli kanë ata. Qeshin me çdo batute te Edi Ramës. Ai i kontrollon, u tregon si duhet të votojnë”, vijoi Rakipi.
Ylli Rakipi nuk u ndal me kaq, duke shtuar se kreu i mazhorancës, Edi Rama po bën përpjekje për të kapur edhe median onine, duke u ofruar reklama dhe para.
