Ndërprerja e transmetimeve analoge në vend, AMA shtyn sërish afatin

Ditën e sotme Autoriteti i Mediave Audiovizive ka bërë të ditur vendimin se është shtyrë afati i transmetimeve analoge në të gjithë vendin edhe për një muaj.

Lajmi është dhënë nga kreu i AMA, Gentian Sala, i cili është shprehur në një deklaratë për mediat se ky vendim është marrë pas një sonddazhi të kryer, në të cilin është rezultuar se shumica e teleshikuesve shqiptarë vijojnë të ndjekin ende transmetimet analoge.

“Nga sondazhi ka rezultuar se shumë qytetarë shohin ende transmetimet analoge. Në mënyrë unanime, AMA ka vendosur shtyrjen e afatit të transmetimeve analoge edhe për katër javë”, tha kreu i AMA.

Kujtojmë që AMA kishte vendosur që më datë 1 shtator 2019 të fikte sinjalin analog për Tiranën, Durrësin dhe Vlorën, por ky vendim është shtyrë tashmë për më 1 tetor.