LIGJET E BIZNESIT
Pedagogu dhe akademiku i njohur, Artan Fuga ka reaguar në lidhje me monumentin për viktimat e puçit në Turqi që u ngrit te parku i Liqenit në Tiranë.
Përmes një reagimi në rrjetet sociale, Fuga shkruan se nuk ka asgjë kundër Turqisë, por se nuk mund të ngrihen paralele mes këtij moumenti dhe emrit “Adem Jashari” të një parku në Stamboll.
Sipas Fugës ky krahasim është me qëllim të pastër propagandistik dhe nuk duhet të bëhet as nga bashkia dhe nga asnjë mbështetës i asaj vepre.
Më poshtë reagimi i plotë i Artan Fugës:
Te mos krahasojmë simbolika pa asnjë lidhje mes tyre!
Unë nuk kam asgjë me Turqinë, madje e respektoj fort sikurse respektoj çdo vend dhe çdo popull, nga më i madhi te më i vogli.
Unë nuk kam asgjë kundër që të respektohet ligji në çdo vend të botës dhe të respektohen njerëz që janë sakrifikuar për idealet e tyre që i kanë quajtur të lirisë!
Unë nuk kam ndonjë koment për të bërë as për pushtetin e z. Taip Erdogan sepse nuk kam bërë ndonjë studim për të. As për marrëdhënien e tij me sektin sufist!
Unë nuk kam dëshirë as të flas për pllakat që vihen te liqeni a kudo qoftë edhe për të rënet në Turqi për të mbrojtur rendin e pushtetin!
Por unë di me saktësi që midis nderimit të dëshmorit Adem Jashari me emrin e një parku në Turqi dhe pllakës përkujtimore për të rënet në rrezistencë ndaj grushtit të shtetit në Turqi, nuk ka asnjë paralele që mund të hiqet.
Cdo paraLele midis tyre është një keqkuptim historik në mos një manipulim propagandistik!
Le të heqim dorë nga këto!
Adem Jashari është i lidhur me një sakrificë për një çështje kombëtare kurse pllakati për dëshmorët kundër grushtit të shtetit me një çështje politike!
Simbolika e Adem Jasharit nuk përkëdhel asnjë njeri në pushtet ose me pushtet as në Kosovë dhe as në Shqipëri, kurse përkujtimi i dëshmorëve turq në një pllakatë përkujton dhe është në një vijë politike me një pushtet të caktuar aktual në Turqi.
Simbolika e Adem Jasharit është konsensuale dhe plebishitare në mes shqiptarëve, ajo figurë është e nderuar edhe nga aleatët dhe partnerët strategjikë perëndimorë të Shqipërisë, kurse cështja e grushtit të shtetit është objekt debatesh dhe kundërshtish në Turqi, Perëndim dhe Shtetet e Bashkuara, pra shenjon marrje pozicioni politik për një çështje të brendshme të Turqisë këtij vendi mik. Përse jo është në atë kohë edhe një diskordancë mes shumë vendesh perëndimore dhe shtetit të Turqisë!
Shqipëria merr pozicion politik për një çështje politike të brendshme në shtetin mik turk!
Ja pra dallimet që nuk mund të mbulohen me një krahasim gjeopolitik e politik të sipërfaqshëm e kështu më këmbë!
Pllakat t’i vemë po deshi Bashkia, por mendjen mos të na e turbullojë, i kam rixha!
Bashkia e Tiranes ka marre nje qendrim politik per nje ceshtje te brendeshme te nje shteti tjeter lidhur me nje ngjarje te kohes sone. Kaq.
Uroj ta kete bere me pelqimin e ministrise se jashtme.
Gjithsesi lavdi Adem Jasharit dhe të gjithë të rënëve për Kosovën, nderim për të rënët dhe viktimat e dhunës në Turqi e kudo, nderim për të gjithë të vdekurit nga cdo anë e barrikadës që janë ndodhur si viktima!
Ky reagim i Artan Fugës, vjen edhe si reagim ndaj gazetarit, Dritan Hila, i cili pak ditë më parë pati dalë në mbështetje të këtij monumenti, duke marrë parasysh pikërisht emrin e parkur në Stamboll, por edhe nje moument në nder të Fan Nolit.
