Meta fjalë të ndjera për regjisorin Xhuvani: Humbje shumë e madhe

Ndarja nga jeta para kohe vetëm 55 vjeç e regjisorit të njohur, Gjergj Xhuvani ka shkaktuar një sërë reagimesh dhe ngushëllime nga personalitete të shquara të vendit.

Një ngushëllim të ndjerë për regjisorin Xhuvani ka bërë edhe presidenti, Ilir Meta. Në postimin e tij në facebook, kreu i shtetit shkruan se, vdekja e Gjergj Xhuvanit, është një humbje e madhe për kinematografinë shqiptare.

“Me hidhërim të thellë mësova për ndarjen sot nga jeta të Gjergj Xhuvanit!

Ikja kaq e parakohshme e këtij regjisori të shquar, skenaristi e producenti të spikatur, i cili shkëlqeu përmes punës së palodhur krijuese dhe modestisë fisnike, është një humbje e madhe për artin dhe kinematografinë shqiptare, që Ai i dha një dimension të shquar edhe ndërkombëtar.

I shpreh familjes, miqve e bashkëpunëtorëve të tij ngushëllimet më të thella e të sinqerta për humbjen e të dashurit të tyre!

Gjergj Xhuvani na la pas një trashëgimi të jashtëzakonshme artistike, që nderohet me respekt nga të gjithë e do të mbahet mend gjithmonë.

I përjetshëm kujtimi i Tij”, shkruan Meta.