Pasi kryeministri Edi Rama i quajti mediat greke kazan, pas publikimit të lajmit se ai po kalonte pushimet i vetëm në shtetin helen, ka ardhur dhe reagimi i gazetarit të njohur grek Vasilis Aleksiu.
Në një prononcim për dosja.al, Aleksiu bën me dije se ai ishte telefonuar nga drejtuesit e hotelit të cilët i kishin thënë se kryeministri shqiptar Edi Rama ishte duke drekuar dhe po pinte kafe vetëm gjatë orës 15:00 deri në 17 të pasdites, më 23 gusht.
Gazetari shton më tej se lajmim ishte pa foto, pasi Rama ruhej nga trupa të shumtë sigurie dhe se drejtuesit e hotelit nuk kanë arsye pse ta sajojnë një lajm të tillë.
“E publikova atë lajm, pasi kontaktova me drejtues të hotelit. Ata më morën në telefon dhe më thanë se Rama ishte në ambjentet e tyre, kishte ngrënë drekë dhe se tashmë po konsumonte një kafe i vetëm.
Nuk kisha foto sepse askush nga personat që ndodheshin në hotel nuk mundën të shkrepnin asnjë. Kryeministri shqiptar ruhej nga shumë truproja. Unë kam shumë besim tek drejtuesit e atij hoteli në Trikalla. Ata nuk kanë arsye të sajojnë diçka të tillë,”- thotë gazetari grek Vasilis Aleksiu.
Media greke Trikalavoice.gr botoi një artikull ku thuhej se kryeministri shqiptar, ndodhej në Trikala. Media shtonte se Rama ishte i vetëm dhe se kishte konsumuar drekë dhe kafe në sheshin e qytetit.
Në dy reagime të njëpasnjëshme në Twitter, Rama u shpreh se edhe media greke është “kazan”, dhe se nuk ka pushuar jashtë vendit që prej 2013-ës. Më tej, Rama thotë se lëvizja për pushime është e kufizuar edhe për ministrat e qeverisë.
