“Me levë në dorë” thyhet memoriali turk te Liqeni, dëshmitarët rrëfejnë se çfarë panë (FOTO)

Memoriali në Parkun e Liqenit që u ngrit për viktimat e rëna me rastin e 3-vjetorit të grushtit të shtetit në Turqi, ka rënë pre e sulmit nga një person ende i paidentifikuar.

Ngjarja ka ndodhur herët në mëngjesin e sotëm.

Dëshmitarët rrëfejnë se ky person theu dhe goditi me levë  rreth orës 06.00 të mëngjesit memorialin turk që qëndron prej më shumë se një muaji në Parkun e Liqenit të Tiranës.

Ashtu si dallohet dhe nga foto, njëri cep i memorialit është thyer.

Kujtojmë se ngritja e këtij memoriali është shoqëruar me polemika të shumta, ku mjaft persona e kanë kundërshtuar atë.

Vetëm pak ditë më parë memoriali u rrethua me letra higjenike dhe aty u la një shënim ku shkruhej se ata kishin respekt për viktimat por duhet të hiqej.

Memoriali u ngrit më datë 15 korrik në Parkun e Liqenit në nderim të 3-vjetorit për viktimat e grushtit të shtetit në Turqi. Lajmi u bë publik vetëm një javë më vonë nga mediat turke, pasi Bashkia e Tiranës e mbajti të fshehtë.