Kompania koncensionare përgenjështron lajmin për taksën e re të Rrugës së Kombit: Nuk ka asnjë pagesë shtesë

Ditën e sotme në media qarkulloi një lajm ku thuhej se ishte vendosur një taksë e re në Rrugën e Kombit, për mjetet e tonazhit të rëndë, e cila do të hynte në fuqi nga 1 shtatori.

Por ky lajm është përgënjeshtruar me anë të një njoftimi për shtyp nga kompania koncesionare   “Albanian Highway Concession” në të cilin thuhet se nuk ka asnjë pagesë apo taksë shtesë për të gjithë përdoruesit e Rrugës së Kombit.

Ndër të tjera në njoftim thuhet se të gjithë përdoruesit do të vazhdojnë të kryejnë pagesat ashtu si deri më sot pa asnjë ndryshim, sipas kategorisë së mjeteve parashikuar në Kontratën Koncesionare.

NJOFTIMI PER SHTYP I SHOQERISE KONCESIONARE ALBANIAN HIGHWAY CONCESSION Sh.p.k

Shoqëria konçesionare dëshiron të informojë të gjithë përdoruesit e Rrugës së Kombit (Autostrada Milot – Morinë) se nuk është e vërtetë dhe nuk ka asnjë pagesë apo taksë shtesë në sheshin e pagesave (Sheshi i Pagesës së Tarifës së Autostradës Milot – Morinë).

Të gjithë përdoruesit e këtij aksi rrugor do të vazhdojnë të kryejnë pagesat sikurse deri më sot, pa asnjë ndryshim, sipas kategorisë së mjeteve të parashikuara në Kontratën Koncesionare.

Aktualisht, shoqëria koncesionare, në zbatim të Kontratës së Koncesionit dhe normave ligjore në fuqi po realizon montimin dhe konfigurimin e peshoreve elektronike. Peshoret do të shërbejnë për monitorimin e automjeteve të rënda (nëse janë brenda normave të parashikuara në ligj ose jo). Qëllimi i këtyre pajisjeve është mbrojtja e elementëve rrugorë (shtresat e rrugës, veprat e artit, urat etj.) nga dëmtimet e mundshme që vijnë si pasojë e ngarkimit të mjeteve të rënda jashtë normave të lejuara.

Faleminderit!

ALBANIAN HIGHWAY CONCESSION Sh.p.k.