Kokëdhima jep versionin e tij para Gjykatës: Ja pse e theva xhamin

Mihal Kokëdhima, pronari i një lokali në Porto Palermo të Himarës ka dalë sot përpara Gjykatës së Vlorës për t’u njohur me masën e sigurisë. Një video që është bërë virale tregon sesi 51-vjeçari u kap për 3 kilometra pas mjetit ku udhëtonte familja spanjolle dhe dy guidat e tyre, në përpjekje për t’i ndaluar dhe për t’u konfliktuar me ta.

Avokatët mbrojtës të Kokëdhimës kanë kërkuar që ai të lihet i lirë me garanci pasurore, pasi nuk plotësohen kushtet për arrest me burg. Ata pretendojnë gjithashtu se shoqëruesit e turistëve kanë sulmuar Kokëdhimën.

Ndërsa gjatë dhënies së versionit të tij për ngjarjen, Kokëdhima ka thënë në lot: “Më morën zvarrë me makinë,  nuk kam prekur njeri me dorë. Ku janë faktet që i preka me dorë. Unë nuk e theva xhamin për t’i dëmtuar, por për t’u mbajtur”.

Më pas ai ka shtuar: “Unë mora targën e mjetit, telefonova policinë, por ata futën marshin që të më shtypnin dhe unë u hodha në kroskot. Kam dy fëmijë në shkollë në Gjermani, ne dy muaj punojmë. Më lini të punoj”.

Mbi 51 vjeçarin rëndojnë 3 akuza: “Kanosje”, “Dëmtime të tjera me dashje” dhe “Shkatërrim te pronës”.