Në kohën që procesi i rivlerësimit të prokurorëve dhe gjyqtarëve (vettingu) po vazhdon
si hapi i parë i reformës në drejtësi, kritikët e Vettingut kanë deklaruar se ky proces është agresiv, me standarde të dyfishta dhe me ndikime politike.
Por kundër këtij mendimi ka dalë shefja e OMN, “operacioni ndërkombëtar i Monitorimit”, Genoveva Ruiz.
Në një intervistë për Zërin e Amerikës ka mohuar se procesi i Vettingut si pjesë e Reformës në Drejtësi të jetë me ndikime politike.
Sipas Calaveras, deri më tani rivleresimi i prokurorëve dhe gjyqtarëve, si pjesë e reformës në drejtësi, ka larguar nga detyra 74 prokurorë dhe gjyqtarë ndërsa 39 të tjerë kanë dhënë dorëheqjen.
Shefja e ONM-së theksoi se ky proces synon kthimin e besimit të publikut në sistemin e drejtësisë shqiptare.
“Procesi i rivlerësimit (i njohur si vetingu) u fillua me objektivin kushtetues të rikthimit të besimit të publikut në sistemin gjyqësor, duke pastruar radhët e sistemit të drejtësisë nga zyrtarët e korruptuar. Seancat dëgjimore janë publike dhe institucionet e mbajnë publikun të informuar për arsyetimin e vendimeve të vetingut. Numri i madh i magjistratëve që japin dorëheqjen ose janë duke u larguar nga puna konfirmon se ky është një proces serioz për rinovimin e gjyqësorit. Janë marrë masa serioze për të siguruar ekuilibrat dhe garancitë e nevojshme për pavarësinë e organeve të vetingut, në veçanti për të siguruar mungesën e ndonjë roli vendimmarrës ose përfshirjes së nivelit politik në to.
Sulmet në rritje ndaj reformës në drejtësi, Vettingut dhe ONM-së, vëzhguesve ndërkombëtarë dhe misioneve tona të asistencës së BE në këtë drejtim janë shumë domethenëse. Këto pretendime janë të pabazuara dhe të papranueshme, por ne i shohim ato si një konfirmim që Vetting-u po trondit themelet e një sistemi të korruptuar. Disa ditë më parë, me rastin e përurimit të Pallatit të ri të Drejtësisë në Tiranë, unë ndoqa një ceremoni diplomimi të Shkollës së Magjistraturës. Unë isha shumë krenare që pashë gjyqtarë dhe prokurorë të rinj që merrnin detyrën dhe të betoheshin për t’i shërbyer Kushtetutës.
Për më tepër, ne kemi dhënë kohët e fundit 42 milion € nga fondet e BE-së në një program të ri drejtësie që do të ndihmojë në konsolidimin e reformës. Kjo është jetike për të mbrojtur qytetarët dhe për të nxitur zhvillimin ekonomik, aq shumë të nevojshëm për të siguruar që brezat e rinj të qëndrojnë në këtë vend të bukur ku kanë lindur pa pasur nevojë të kërkojnë një të ardhme më të mirë jashtë vendit’, tha shefja e ONM-së, Genoveva Ruiz Kalavera.
