Iu gjet arsenal me armë në magazinë, kush është biznesmeni që u dorëzua në polici

Vetëm një muaj e gjysmë ka zgjatur arratia e biznesmeni Ilir Beko, i cili akuzohet se është pronari i arsenalit të armëve të gjetura në zonën e Bradasheshit në Elbasan.

Beko është paraqitur sot në polici për tu vënë në pranga, ku do të përballet me akuzën e prodhimit dhe mbajtjes së armëve luftarake pa leje.

Në bazë të informacioneve që raporton Shqiptarja.com, Ilir Beko do të dalë nesër para gjykatës në Elbasan, ku do të njihet me masën e sigurisë që trupa gjykuese do të vendosi, në bazë dhe të dosjes së përgatitur nga Prokuroria.

Gjatë një kontrolli të RENEAS në zonën e Bradasheshit në Elbasan, efektivët kanë gjetur në një magazinë në pronësi të Bekos një arsenal armësh të sofistikuara, të cilat përdoren nga NATO dhe shtetet anëtare që bëjnë pjesë në të.

Magazina me armë në pronësi të biznesmenit Beko është gjetur vetëm një ditë pas atentatit të bërë ndaj dy vëllezërve Klevi dhe Sandër Baho në fshatin Brushkë, ky mbeti i vrarë Klevi. Nuk dihet nëse gjetja e armëve të sofistikuara dhe me një preçizion tepër të lartë e lidh Biznesmenin Beko me atentatin ndaj dy vëllezërve, apo gjetja e armëve një ditë pas vrasjes së Klevi Bahos ishte rastësore.

Armët e gjetura në magazinën e Bekos janë nisur menjëherë për ekspertim balistik dhe daktilografik në institutin e policisë Shkencore në Ministrinë e Brendshme, ndërsa pritet të dalë nëse ato janë përdorur në ndonjë ngjarje kriminale brenda vendit apo nuk kishin arritur të përdoreshin ende pas mbërritjes nga shtetet fqinje.

Ilir Beko është pronar i vetëm i kompanisë ‘ELDIO PETROL’ me zyra qëndrore në Bradashesh dhe me objekt aktiviteti ‘Tregetim te materialeve duralumin, ndertimi, elektroshtepiake. Tregeti me pakice të karburanteve, vajrave lubrifikant, agjensi turistikereklamash,hoteleri turizem, etj .Bar-kafe. Import makina transporti te perdorura dhe tregetim makina transporti te perdorura.’