Një ngjarje e denjë për një skenë të filmave horror është ajo që ka ndodhur në Durrës. Mëngjesin e sotëm, peshkatarët kanë nxjerrë nga deti kufomën e një njeriu. Viktima është e seksit mashkull dhe është gjetur rreth 1 milje në det të hapur nga peshkarexha “Emiliani”.
Kufoma është e dekompozuar, ndërsa trupi i pajetë ishte i lidhur me letër natriban, çka për policinë do të thotë se bëhet fjalë për një vrasje. Peshkatarët kanë njoftuar policinë, që ka kryer veprimet e para dhe këqyrjen paraprake të kufomës.
Viktima nuk është identifikuar ende, ndërsa do të jetë mjeko-ligjorët që do të përcaktojnë zyrtarisht shkaqet e vdekjes. Kufoma është përcjellë drejt morgut të spitalit Durrës për ekzaminime të mëtejshme.
