Euro fillon ngritjen pas ‘pikiatës’ sezonale, ja me sa u këmbye sot

Monedha e përbashkët ka shënuar rritje në tregun vendas ditët e fundit, pas rënies që ajo pësoi në fillim të gushtit, duke reflektuar në këtë mënyrë fundin e efekteve sezonale.

Sipas kursit zyrtar të Bankës së Shqipërisë, një euro u këmbye sot me 121.49 lekë, duke shënuar të tretën ditë me rritje. Ekspertët e këmbimit valutor pohojnë se fundi i gushtit tradicionalisht shoqërohet me zhvlerësim të monedhës vendase, për shkak të përfundimit të efekteve sezonale, teksa emigrantët largohen dhe fluksi i turistëve fillon e bie.

Ekspertët presin që deri në dhjetor, euro të vijojë të jetë më e qëndrueshme, ndërsa nga fundi i dhjetorit, rifillimi i efekteve sezonale, me ardhjen e emigrantëve, përgjithësisht i zhvlerëson valutat.

Në fillim të muajit gusht euro ra ndjeshëm, duke zbritur në 120.75, që ishte jo vetëm niveli më i ulët i këtij viti, por edhe rekordi i 12 viteve (që nga 2007), teksa euro iu afrua nivelit më të ulët ët të gjitha kohërave, i cili është arritur në  dhjetor 2007, kur euro zbriti për pak kohë në 120.4 lekë.

Që nga fillimi i vitit deri në 27 gusht, kursi mesatar i euros është 123.3 lekë, nga 127.6 lekë që është mesatarja e 2018-s, me një nënçmim prej 4.3 lekësh.

Rënia është më e ulët në raport me vitin e kaluar, ku përgjatë gjithë 2018-s, euro u zhvlerësua mesatarisht me 6.5 lekë.

Që nga mesi i vitit 2016, kur monedha e përbashkët ka hyrë në një cikël të pandalshëm rënës, euro ka rënë me 16.5 lekë, ose gati 12%. Kjo rënie ka ardhur pavarësisht se deficiti i llogarisë korente (që mat hyrje-daljet e valutës nga Shqipëria) nuk ka shfaqur shenja përmirësimi.

Sipas ekspertëve, rënia e qëndrueshme e euros lidhet me rritjen e ofertës për valutë, kryesisht nga kanalet informale si dhe qarkullimin e ngadaltë të monedhës vendase.

Eksportuesit janë ata që janë goditur më shumë nga rënia e euros, pasi i kanë të ardhurave në valutë dhe shpenzimet në lekë. Edhe Banka e Shqipërisë në një raport të fundit pohonte se një zhvlerësim i mëtejshëm i euros do të ndikonte negativisht në ekonomi, ndonëse parashikonte që monedha e përbashkët do të ishte më e qëndrueshme në të ardhmen.

Revista Monitor