Ditën e djeshme u bë publik lajmi se një 13 vjeçar ishte përdhunuar dhe më pas shantazhuar nga tre persona në Tiranë.
Autorët e ngjarjes së rëndë kishin filmuar videon e abuzimit dhe e detyruan të miturin t’ju jepte çelësat e shtëpisë së tezes, për ta grabitur.
Ngjarja ka ndodhur disa ditë më parë, ku pas denoncimit të tezes në polici për bizhuteritë e vjedhura, doli në dritë historia e abuzimit me 13 vjeçarin.
Si rezultat i hetimeve, janë arrestuar dy nga autorët e dyshuar: shtetasit Valter Hysaj, 20 vjeç, dhe Fatmir Haxhiu, 21 vjeç, banues në Kombinat. Ndërsa është shpallur në kërkim 45- vjeçarin Bledar Matja, që duket se është edhe ideatori i kësaj historie.
Sipas “panorama”, i mituri, që pas një muaji mbush 14 vjeç, prej disa ditësh kishte ardhur me pushime në Tiranë dhe qëndronte në shtëpinë e tezes së tij. Prindërit e tij jetojnë jashtë Shqipërisë.
Dy të rinj që synonin paratë, duke qenë se ishin në dijeni të faktit se tezja e të miturit kishte gjendje të mirë ekonomike, e kanë afruar 13-vjeçarin për disa ditë me radhë.
Ata e kanë ftuar në shtëpi djalin e mitur, duke i propozuar të luanin me videogame dhe më pas kanë abuzuar seksualisht me të, ndërsa njëri prej tyre ka realizuar videon, e cila më pas është përdorur për t’i vënë gjobë. Për disa ditë me radhë ata i kanë bërë shantazh të miturit, duke i thënë se do ta publikonin videon në rrjetet sociale në rast se nuk u jepte 5 mijë euro.
Duke qenë se i mituri nuk kishte mundësi t’u jepte autorëve shumën e parave që i kishin kërkuar, ata e kanë detyruar që t’i ndihmonte për të hyrë në shtëpinë e tezes. Ata janë futur me çelësin që kishte djali dhe kanë marrë nga aty bizhuteri të çmuara, mes të cilave edhe një unazë diamanti.
Vjedhja është konstatuar pas disa orësh nga e zonja e shtëpisë, e cila ka denoncuar ngjarjen në Komisariatin Nr.6.
Kur oficerët e Policisë kanë bërë këqyrjen e vendit të ngjarjes, kanë konstatuar se vjedhja ishte kryer pa thyerje, pa forcë dhe pa përdorur asnjë objekt për hapjen me dhunë të derës. Në këtë moment kanë lindur dyshimet për ndonjë bashkëpunëtor të brendshëm dhe i mituri, duke qenë se ishte i vetmi përveç tezes që kishte çelësin e shtëpisë, ka pranuar të tregojë gjithçka./Panorama
