Duhej të kishte filluar në korrik, ja çfarë ka ndodhur me vettingun në polici

Vettingu në polici ishte një nga premtime më të mëdha të Fatmir Xhafajt në fillim të vitit 2017, kur ai mori detyrën si ministër i Brendshëm, duke pasuar, Saimir Tahirin.

Po jo vetëm që me Xhafaj ky proces i shumë përfolur për rivlerësimin e policëve nuk nisi, por as tani që në krye të kësaj ministrie është Sandër Lleshaj nuk duket se do të nisë.

Pak muaj më parë pati një polemike mes Lleshajt dhe Xhafajt në parlament lidhur me shtyrjen e fillimit të këtij procesi, që në fund u dakordësua që të fillonte në muajin korrik.

Por teksa korriku iku dhe të njëjtën gjë po bën edhe gushti, nuk ka ende asnjë shenjë të fillimit të vettingut në polici, shkruan Fast News Albania.

Zërat nga ministria thonë se ky proces mund të fillojë në muajin shtator, por duke parë agjendën e ngjeshur që e pret politikën shqiptare në vjeshtë, zorë se ndokush do të ketë terezinë që të merret me vettingun në polici. Tani nuk na mbetet gjë tjetër veçse, të presim.