LIGJET E BIZNESIT
Revista franceze “Courrier des Balkans” i ka kushtuar një artikull kandidatit të PS-së në Shkodër, Valdrin Pjetri dhe asaj që ndodhi në këtë qytet me zgjedhjet e 30 qershorit.
“I dënuar për trafik droge, kryetari i Bashkisë së Shkodrës jep dorëheqjen para se të marrë detyrën”, është titulli kryesor i artikullit të gazetës, që si audiencë ka politikanë, diplomatë e studiuesit të interesuar për Europën Juglindore.
“Valdrin Pjetri, kandidati socialist për kryetarin e Shkodrës, i zgjedhur në zgjedhjet bashkiake të 30 qershorit të bojkotuar nga opozita, u dënua nga një gjykatë italiane në 2003 me 18 muaj burg për trafik droge.
Partia Demokratike (PD) beri publike dokumentet e drejtësisë italiane në 13 gusht, duke zbuluar arrestimin e tij në flagrance më 27 janar 2003. Valdrin Pjetri u dëbua më pas nga Italia, dhe u ndalua te hyje ne Itali për dhjetë vite”, theksohet në artikull.
Shkrimi citon ligjin shqiptar për dekriminalizimin, sipas së cilit, personat që janë dënuar nga gjykatat nuk mund të marrin funksione publike dhe fshehja e dënimeve është vepër penale. “Meqenëse ai duket se ka gënjyer për të kaluarën e tij, Valdrin Pjetri duhet të përgjigjet para drejtësisë”, citon artikulli.
Më tej theksohet ngjitja e Valdrin Pjetrit, ku nën qeverinë e Edi Ramës, pati një karrierë shumë të shpejtë, duke u bërë kreu i ZRPP, e me vone prefekt i Shkodrës. “Edi Rama më pas e emëroi si kandidat të Partisë Socialiste (PS) për kryetar të Bashkisë Shkodër, në kundërshtim me vullnetin e bazës në Shkodër.
Pas zgjedhjeve të 30 qershorit, pasi akuzat e Valdrin Pjetrit filluan të dalin, kryeministri e emëroi atë drejtues politik të PS për rajonin e Shkodrës, duke zëvendësuar ish-ministrin e Jashtëm Ditmir Bushati”, shkruhet në artikullin e gazetës franceze.
