“Boom” me ndërtimet para zgjedhjeve. Ja bashkitë që lëshuan dorën

Bashkitë lëshojnë dorën me lejet e ndërtimit. Një boom lejesh për pallate, shtëpi dhe biznese është konstatuar në të gjithë vendin gjatë tremujorit të dytë të këtij viti. Sipas Institutit të Statistikave, gjatë muajve prill-qershor 2019, periudhë që përkon edhe me zgjedhjet vendore, në të gjithë territorin e vendit u dhanë 310 leje ndërtimi, me një rritje vjetore prej 15%.

Në total, vlera e ndërtimeve llogaritet në 14.8 miliardë lekë, apo rreth 121 milionë euro, nga ku mbi gjysma i takojnë pallateve. Në rritje rezultojnë edhe lejet e reja për hotele dhe ndërtesa tregtare si dyqane, mapo dhe qendra tregtare.

“Me 111 leje të miratuara në periudhën prill-qershor, Tirana është qarku ku do të ndërtohet pjesa më e madhe e këtyre ndërtesave. Ndjekur nga Durrësi, Elbasani dhe Shkodra që kanë akorduar më shumë leje krahasuar me një vit më parë”, thekson A2 CNN, referuar raportit të INSTAT-it.

Ndërtimet e reja falë taksës së ndikimit në infrastrukturë përbëjnë bazën kryesore të të ardhurave të bashkive. Bumi i lejeve erdhi gjithashtu në muajt që i parapritën zgjedhjeve lokale dhe në kushtet kur qeveria kishte pezulluar të gjitha tenderat për pushtetin vendor.