Bënte kërdinë duke grabitur banesat e pushuesve në Durrës, arrestohet “skifterja” nga Tirana

Policia e Durrësit ka vënë në pranga mesditën e sotme një 32-vjecare nga Tirana, e cila dyshohet se hynte në banesat e pushuesve dhe ju vidhte sende me vlerë.

Uniformat blu bëjnë me dije se e arrestuara është shtetasja me iniciale G.L, 32 vjec, banuese në Tiranë.

NJOFTIMI ZYRTAR I POLICISE

Specialistët për Krimet në Stacionin e Policisë Plazh, ne Durres, kanë arrestuar një femer, e cila hynte në banesat e pushuesve dhe i merrte sende me vlerë.

Është vënë në pranga shtetasja G.L., 32 vjeçe, banuese në Tiranë.

Nga veprimet hetimore të kryera dyshohet se shtetasja e mësipërme është autore e 2 vjedhjeve dhe e 2 rasteve të tjera të tentativës për vjedhje, konkretisht:

• Më datë 25.08.2019, në lagjen Nr.13, dyshohet se ka hyrë në banesën e shtetases M.B. dhe ka marrë një çantë, në të cilën kishte dokumente personale dhe vlera monetare.
• Më datë 25.08.2019, në lagjen Nr.13, dyshohet se ka tentuar të vjedhë banesën e shtetasit A.D.
• Më datë 26.08.2019, në lagjen Nr.13, dyshohet se është futur në banesën e shtetasit L. A., banues në Kosovë dhe i ka marrë çantën e dorës.
• Më datë 26.08.2019, në lagjen Nr.13, dyshohet se është futur në banesën e shtetases L. B. dhe ka tentuar të marrë çelësat e banesës.

Materialet i kaluan Prokurorisë së Rrethit Gjyqësor Durrës, për veprime të mëtejshme, për veprën penale “Vjedhja”.