Është liruar nga akuzat për ngacmim seksual, ish-ministri i Shëndetësisë në Kosovë, Numan Baliq.
Lajmin për këtë e ka bërë me dije vet kirurgu, i cili një pjesë të aktvendimit e ka postuar në profilin e tij në Facebook.
E aty thuhet se Gjykata Themelore në Pejë, saktësisht gjyqtari Sejdi Blakaj ka nxjerr aktgjykim që e lë në liri.
“Konform nenit 364 par 1 pika 1.3 të KPPK-së lirohet nga akuza”, ka thënë ai.
Numan Baliq, akuzohej për ngacmim seksual ndaj një punonjëse në Spitalin ku punon.
Prokuroria Themelore e Pejës kishte ngritur aktakuzë për këtë vepër ndaj Baliqit, me çka dyshohej se nga muaji gusht i vitit 2018 në vazhdimësi e ka ngacmuar praktikanten e Spitalit Rajonal të Pejës duke i shkruar mesazhe me përmbajtje ngacmimi në telefon dhe duke i dërguar edhe letra. Sipas aktakuzës, Baliq i kishte dhënë letra me përmbajtje ngacmimi dëshmitares A.K., për t’ia dërguar praktikantes, letra të cilat më pas i kishte lexuar dhe i kishte grisur viktima.
Rasti ishte paraqitur në Polici në shtator të vitit të kaluar.
Pas aktakuzës ai ishte pezulluar nga puna, si kirurg në Spitalin Rajonal të Pejës.
