Akuzat e rënda të PD, reagon Valdrin Pjetri: Gjyq publik, jam i hapur për çdo lloj verifikimi

Kryetari i Bashkisë Shkodër dalë nga zgjedhjet vendore te 30 qershorit, Valdrin Pjetri u është përgjigjur akuzave të Partisë Demokratike, ku thuhej se ka qenë i arrestuar në Itali për trafik droge.

Pjetri në një prononcim të shkurtër për mediat u shpreh se nuk ka qenë kurrë I arrestuar dhe se kjo ngjan më tepër me një gjyq publik dhe se ai është i hapur për cfarë do lloj verifikimi.

“Kam qënë në qendër të sulmeve nga PD-ja. Kam qënë më se i hapur për çdo verifikim të mundshëm. Ky ngjan më shumë si një gjyq publik. Asgjë dhe askush nuk na ndal të futemi në Bashkinë Shkodër. Unë kam shkuar disa herë drejt Italisë. Verifikohet me TIMS. Nuk kam qënë  arrestuar,”-tha Pjetri.

Kujtojme se disa ditë më parë Partia Demokratike publikoi një letër dërguar Prokurores së Përgjithshme të Përkohshme Arta Marku, ku ka kërkuar të verifikohej pastërtia e figurës së Valdrin Pjetrit.

Sipas PD ka indicie që Pjetri ka qenë i arrestuar në Itali për trafik droge.