LIGJET E BIZNESIT
Ishte një kohë kur Tirana ishte krenaria e futbollit shqiptar. Sigurisht flasim për atë kohë kur në zemër të kësaj skuadre ishin ata, ‘tironsit’, që e njohin më mirë se kushdo tjetër thelbin dhe kuptimin e ngjyrave bardheblu. Ishte kjo kohë kur titulli kampion për Tiranën nuk ishte një objektiv, por detyrim.
Nëse duam të gjejmë një figurë që mishëron më së miri mentalitetin e Tiranës, ai është Agustin Kola.
I cilësuar si një nga mesfushorët më të mirë të të gjithë kohërave që ka prodhuar futbolli shqiptar, Kola ende edhe sot cilësohet si një ikonë e pazëvendësueshme e Tiranës, aty ku ai u rrit dhe ku bëri historinë. Agustin Kola solli në ato vite dhe një model tjetër të ish futbollistit dhe trajnerit, atë te një njeriu që nuk bëri kurrë kompromis në dëm të ‘Tironës’. Të gjithë “herë me parë e herë pa pare” e bënë Pazar, por Kola jo!
Mirëpo si kudo kjo nuk u vlerësua kurrë!
Agustin Kola edhe pse nuk lë asnjë ndeshje të Tiranës pa parë në stadium (me gjithë situatën jo fortë të mirë në vitet e fundit), nuk u nda kurrë nga Tirona. Klubi kurrë nuk i administroi aftësitë dhe reputacionin njerëzor të fituar me shumë mund e kosto në vite. Kjo ndodh se “maloku” nuk manipulohet e nuk bëhet pazar me të.
E pra, do ishte nder dhe fat për ekipin e ‘Tironës’ që të kishte një garanci për mbarëvajtje dhe të vlerësonte Kolën e madh.
Fati që Agustini është mes nesh duhet të administrohet nga klubi i cili kurrë s’pati mbështetje as nga deputetë, as nga familja kryeministrore apo ministra por vetëm nga ata që të qenurit tifozë me ‘Tironën’ e trashëguan në breza si gjakun.
Për klubin që s’qe as i ministrisë së Brendshme as i asaj të Mbrojtjes por i rrugicave me kalldrëm.
E pra në vlerësim të emrit te klubit ‘Tirona’ duhet vlerësuar modeli i Agustin Koles dhe jo individi, duhet ndezur një tifozeri fisnike dhe e kulturuar si vetë tradita e klubit.
Sot se nesër do jet tepër vonë të marrin nga Agustini shpirtin e garës, kulturën e pas ndeshjes dhe patjetër ndershmërinë./ Fast News Albania
