Në intervistën e parë pas pushimeve, Lulzim Basha ka ritheksuar edhe njëherë se vendimi i opozitës për të hyrë në zgjedhje vetëm me qeveri tranzitore dhe pa Edi Ramën kryeministër mbetet në fuqi.
Në prononcimin e tij në Syri Tv, Basha u shpreh se ky është një vendim që PD e ka marrë dhe vijon t’i qëndrojë plotësisht deri në realizim.
“Ne kemi marrë një vendim, e zezë mbi të bardhë. Në këtë vendim kushti kryesor është zgjedhje me qeveri tranzitore pa Edi Ramën kryeministër. Sa kohë që ky vendim politik të jetë në fuqi partia demokratike dhe opozita e bashkuar do të vazhdojnë aksionin e tyre” deklaroi Basha.
Në lidhje me zgjedhjet e 13 tetorit dhe faktit se Partia Demokratike nuk paraqiti kërkesë për regjistrimin në zgjedhje Basha sqaroi se asnjë parti opozitare nuk është regjistruar në zgjedhjet e 13 tetorit pasi KQZ e kontrolluar nga Edi Rama sipas tij e ka pamundësuar zhvillimin e tyre.
“Nuk është regjistruar askush në zgjedhjet e 13 tetorit. Për arsye se KQZ e kontrolluar nga Edi Rama ka pamundësuar zhvillimin e zgjedhjeve të 13 tetorit. KQZ në dhunim të kushtetues nuk ka zbatuar dekretin e presidentit. Partitë opozitare janë gati në çdo kohë të garantojnë qytetarëve lirinë e votës” tha kreu i PD.
