LIGJET E BIZNESIT
Dihet tashmë që të jesh deputet i Parlamentit ka përfitime të mëdha financiare dhe këtu nuk flasim për rrogën që ata marrin çdo muaj për të mbrojtur interesat e qytetarëve që i kanë votuar.
Janë disa trajtime ekstra që parlamentarët tanë i marrin çdo muaj përveç rrogës dhe njëra prej tyre është tarifa për qiranë. Kjo tarifë që shkon deri në 35 mijë lekë të reja i jepet një deputeti që provon se nuk ka një banesë në pronësi të tij në kryeqytet.
Lista e këtyre deputetëve qiraxhinj që nuk kanë shtëpi në Tiranë gjithmonë ka qenë e madhe dhe e tillë vazhdon të jetë në këtë legjislaturë.
Konkretisht, Ilir Pendavinji, Edlira Bore, Ediola Braha, Niko Peleshi, Senida Mesi, Luan Harusha, Fadil Nasufi dhe Fate Velaj marrin rimbursim qiraje, i cili shkon në rreth 35 mijë lekë të vjetër bruto.
Por jo vetëm kaq, pasi një tjetër benefit që marrin deputetët janë edhe rimbursimet e karburantit, sipas të cilit ata marrin një shumë mujore. Ndarja bëhet në bazë të qarkut, ku deputetët në zonat më të largëta marrin deri në 40 mijë lekë në muaj karburant.
Pra e thënë me fjalë të tjerë, përveç rrogës, deputetët shqiptarë marrin nga buxheti i shtetit shqiptar një page ekstra për nevojat e tyre që të mund t’i shërbejnë sa më mirë qytetarëve që i kanë votuar edhe pse të gjithë mund të ngremë pikëpyetje nëse ata vërtetë e bëjnë këtë apo nëse e dinë rrugën për në zonat e tyre elektorale.
