Vranë kalimtarin e pafajshëm me bukë në dorë në Kavajë, të arrestuarit ja plasin të qeshurës në gjyq (FOTO)

Ditën e sotme Gjykata e Kavajës ka dhënë masën e sigurisë për 5 të arrestuarit në ngjarjen e Kavajës, ku u vra kalimtari i pafajshëm Ramazan Hasanlliu, 52-vjeç në momentin që po blinte bukë.

Për katër nga pesë të arrestuarit, Eraldo Hyka, Qazim Merkaj, Ardian Dedej dhe Marius Aliaj, gjykata ka vendosur masën e sigurisë “Arrest me burg”, ndërsa për të arrestuarin e pestë Agron Kollçaku është vendosur masa e sigurisë “Arrest shtëpie”.

Por ajo që ra në sy gjatë seancës së sotme gjyqësore  ishte fakti që të pandehurit flisnin dhe qeshnin me njëri tjetrit, brenda në zonën e të akuzuarve, teksa vetëm pak ditë më parë vranë dikë të pafajshëm dhe plagosën 5 persona të tjerë.

Kujtojmë se më 4 korrik në Kavajë u përplasën me armë zjarri dy grupe rivale dhe si për pasojë humbi jetën Ramazan Hasanlliu, kalimtari që nuk kishte lidhje me ngjarjen.

Si pasojë e breshërisë së plumbave u plagosën edhe pesë persona të tjerë, nga të cilët dy ishin pjesë e grupeve që morrën pjesë në përplasjen me armë zjarri që tronditi qytetin dhe mbarë opinionin publik.