LIGJET E BIZNESIT
Partia Demokratike vijon serinë e saj të denoncimeve, për ato që i ajo i quan afera të pastra korrupsioni.
Këtë herë është ish-deputeti i PD, Agron Shehaj që ka denoncuar koncesionin e dhënë për “Rugën e Kombit”. Në një reagim përmes rrjeteve sociale, Shehaj shkruan se kompania që marrë këtë koncesion vetëm në këtë vit ka arritur të fitojë 10 milionë euro, duke e nxjerrë zbuluar këtë aferë të qeverisë.
Postimi i Agron Shehajt:
Shqipëria nuk është e varfër, por vidhet çdo ditë nga Rama dhe klientët e tij. Ky është bilanci i kompanisë që ka me koncesion mirëmbajtjen e Rrugës së Kombit. Vetëm për vitin 2018, kompania ka fituar rreth 10 milionë euro. Para që u janë marrë qytetarëve nga taksa e kalimit, por edhe nga Buxheti i Shtetit.
Trau në Rrugën e Kombit është vendosur në Shtator të 2018 dhe ortakët e Kompanisë do fusin në xhep 10 milionë euro vetëm në 3 muaj e gjysmë punë, me një marzh fitimi prej afro 40%.
Ky është vetëm viti i parë i një koncesioni që do të zgjasë 35 vjet. Dhe për 35 vjet qytetarët do paguajnë nga xhepi për fitimet e majme të koncesionarit.
Ky është mashtrimi i Edi Ramës. Ai tha që koncesioni duhej për të mirëmbajtur Rrugën e Kombit por në të vërtet duhet për të pasuruar atë dhe miqtë e tij.
Kjo është një provë e qartë pse Rama ka përdorur masivisht PPP-të, pavarësisht kritikave të Bankës Botërore, FMN-në dhe Departamentit Amerikan të Shtetit: të vjedhë shqiptarët për të pasuruar veten dhe për të konsoliduar pushtetin personal.
Partia Demokratike do të ndjekë paratë për çdo koncesion të padrejtë dhe do vendosi para drejtësisë të gjithë pushtetarët grabitqarë dhe ortakët e tyre.
 
