Numri dy i partisë Socialiste, Taulant Balla ka reaguar shumë ashpër në lidhje me vendimin e marrë sot nga Gjykata e Durrësit, e cila e shpalli të pavlefshëm mandatin e Valbona Sakos, i marrë më 30 qershor.
Në një reagim në rrjetet sociale, Balla e cilëson vendim absurd dhe një lajthitje anti-ligjore të radhës këtë herë nga një gjyqtare.
Më tej Balla bën juristin, duke sqaruar se mandatet e kryebashkiakëve në Shqipëri jepen vetëm nga KQZ dhe Kolegji Zgjedhor dhe janë të paankimueshme.
Postimi i plotë i Taulant Ballës:
Keqardhje për vendimin absurd, arbitrar dhe nul te një gjyqtareje, e cila mori brohoritjet e atyre qe në vijim të përpjekjes se deshperuar per kaos e pasiguri, nuk dinë më cfarë bëjnë. Pavarësisht kesaj lajthitjeje anti-ligjore dhe anti-logjike të radhës, në respekt të vullnetit të popullit, çdo kryetar i sapo zgjedhur pas shpalljes së vendimit vetëm nga KQZ apo Kolegji Zgjedhor do ta marrë detyrën, do ta ushtrojë dhe do të japë llogari përpara Këshillit Bashkiak sikurse ligji e parashikon.
Nuk ishte parë e dëgjuar në gjithë këto vite që një vërtetim i thjeshtë fakti të refuzohet duke dalë hapur në shkelje flagrante të ligjit mbi një vendim të formës së prerë. Në Shqipëri sipas Kodit Zgjedhor mandatet e të zgjedhurve i jep vetëm KQZ dhe Kolegji Zgjedhor. Dhe vendimet e Kolegjit Zgjedhor janë përfundimtare dhe të pa-ankimueshme.
Sidoqoftë me keqardhje për ata që kanë humbur rrugën e arsyes, ne mbetemi të qetë dhe të vendosur në rrugën e hapur nga populli më 30 Qershor.
