Administratori i Partisë Socialiste në njësinë Dermenas në Fier Dilaver Shyti dhe Almer Shena, të cilët ranë në prangat e policisë për një ndërtim pa leje në bregdetin e Darzezës janë liruar nga burgu.
Gjykata ka dhënë të njëjtin vendim “detyrim paraqitje” për të dy të arrestuarit.
Shyti u arrestua nga policia 3 ditë më parë por tashmë gjykata ka vendosur për të “detyrim paraqitje”.
Njoftimi i arrestimit:
Operacion policor kundër informalitetit, evazionit në turizëm dhe ndërtimeve pa leje.
Policia ndalon për “Shpërdorim detyre” Kryetarin e Njësisë Administrative Dërmënas dhe një shtetas tjetër për “Ndërtim pa leje”.
Seksioni për Hetimin e Krimit Ekonomik e Financiar në Drejtorinë Vendore të Policisë Fier, në kuadër të masave të mara kundër informalitetit, evazionit në turizëm, ndërtimeve të paligjshme, pas një kontrolli të ushtruar në plazhin e Darzezës, bënë ndalimin e shtetasve:
D.Sh, 50 vjeç, banues në Darzezë (Kryetar i Njësisë Administrative Dërmënas).
A.Sh, 43 vjeç, banues në Cakran.
Shtetasi D.Sh, në kundërshtim me ligjin, ka lejuar ndërtim pa leje dhe ka zënë hapsirat publike në zonën e plazhit Darzezë, duke i dhënë një kontrat qeraje me sipërfaqe 500 metra katror shtetasit A.Sh.
Materialet i kaluan Prokurorisë pranë Gjykatës së Shkallës së Parë Fier për veprën penale “Shpërdorim detyre” në ngarkim të shtetasit D.Sh dhe për veprën penale “Ndërtim pa leje” në ngarkim të shtetasit A.Sh.
