Kryeministri Edi Rama, në fjalën e tij përpara gazetarëve në konferencën që po mban në kryeministri, tha se Policia e Shtetit do të modernizohet dhe se do të ulet mosha mesatare e punonjësve të policisë.
Rama tha se nuk do të ketë më efektivë policie mbi moshën 55-vjec.
Ai shtoi gjithashtu se është gati një njësi Super Speciale, ku do të godasë ata që cilësohen si “të fortë” në Shqipëri.
Rama shtoi se kjo strukturë nuk do të lejojë më të “fortët” të kërcënojnë lagjet dhe qytetet në vend dhe ata duhet të përgatiten të hyjnë në vrima.
“Kemi bërë gati një njësi Super-Speciale, që do të merret ekskluzivish me të gjithë të ‘fortët’ e rrugëve, ose të lagjeve, ose të qyteteve. Kjo strukturë do jetë kundër këtyre tipave që bëjnë të ‘fortë’. Këta tipa nëse do të vendosin të qëndrojnë në Shqipëri duhet të përgatiten për t’u fshehur në vrima që duhet të jenë shumë shumë të ngushta, përndryshe nuk do të kenë mundësi të marrin frymë.
Shifrat sa i përket kriminalitetit. Vrejmë me kënaqësi që janë finalizuar nga Forca-Ligjit 10 operacione më shumë se në të njëjtën periudhë të një viti më parë. Forca e Ligjit ka zhvilluar 20 operacione dhe ka goditur 12 grupe kriminale.
Sa i përket kriminalitetit të rrugës, të gjitha shifrat janë të qëndrueshme, që mund të ishin më të mëdha, nëse policia nuk do ishte e preokopuar ditë e natë me përmbajtjen e lëvizjeve anti-shtet. Vettingu në Policinë e Shtetit. Ka filluar verifikimi për 45 dosjet e para. Do të avacojmë me aktin normative me të gjitha pagesat jashtë orarit për Policinë e Shtetit. Reformë për uljen e moshës mesatare në polici, duke u dhënë mundësi e pensionit policëve nga 65 në 55 vjeç. Nuk mund të ketë policë më të mëdhenj se 55 vjeç”, – tha Rama.
