Shembja e Teatrit Kombëtar, paralajmëron Basha: Do përgjigjen para drejtësisë, ndërtimi do të jetë burgu i tyre

Kreu i Partisë Demokratike Lulzim Basha ka reaguar duke e quajtur projektin për Teatrin Kombëtar si një projekt kriminal dhe grabitqar.

Ai thotë se secili arkitekt i huaj ose vendas e deri te Edi Rama do të përgjigjen për këtë korrupsion masiv dhe krimin ndaj parave publike dhe pasurive.

Në fund Basha ka shkruar se për ata që mendojnë të ndërtojnë, do të jetë burgu i tyre, ndërsa gropa që do të hapin në truallin e teatrit do të jetë gropa e tyre.

REAGIMI I PLOTE I KREUT TE PD LULZIM BASHA

Projekti i teatrit kombëtar është projekt kriminal grabitqar. Ai ka vetëm një qëllim: grabitjen nga Rama të dhjetëra milionave euro. Njësoj si projekti i stadiumit, ku Edi Rama është pronari i vërtetë i gjysmës tij. Njësoj si projekti i unazës ku Edi Rama do vjedhë miliona euro. Një hajdut psiqik që nuk ngopet pa vjedhur të gjithë Shqipërinë.

Dua t’i them troç çdo arkitekti të huaj e vendas, çdo funksionari, çdo drejtuesi nga më i parëndësishmi tek Edi Rama se do të përgjigjen para drejtësisë për këtë korrupsion masiv dhe krimin që po i bëjnë pasurive dhe parave publike.

Atyre që mendojnë se do të ndërtojnë, dua t’ju them se ndërtimi do të jetë burgu i tyre. Dua t’u them qartë: gropa që mendojnë se do të hapin në truallin e teatrit do të jetë gropa e tyre