Sa paguhej mjeku i Enverit? Isuf Kalo befason me përgjigjen e tij

Isuf Kalo ka rrëfyer në një intervistë për “5 pyetjet nga Babaramo” disa nga momentet e tij më delikate gjatë kohës kur ishte mjek i ish-diktatorit.

Kalo ka treguar ndër të tjera edhe për pagesën e tij, që nuk kishte ndryshime nga ajo e mjekve të tjerë në vend.

Sipas tij mjekët që shërbenin në Bllok kishin nivel pagash të njëjtë me mjekët e tjerë të Shqipërisë sipas punës që bënin.

“U krijua një strukturë që ishte Drejtoria e Dytë që ishte me sigurimin e udhëheqjes, e cila duhet të ketë sugjeruar krijimin e Bllokut si vend për ta pasur më lehtë ruajtjen e tyre në grup sesa veç e veç. Ishte Drejtoria e Pritjes, që kujdesej për banesat, për veshjen, për ushqimin e udhëheqjes, pra për nevojat jetësore. Dhe ishte një strukturë e klinikës speciale. Ishte shumë interesant fakti që të tria këto struktura vareshin nga ministri të ndryshme. Struktura e mbrojtjes dhe e sigurimit varej nga Ministria e Brendshme, struktura e pritjes varej direkt nga kryeministria, nga një zëvendëskryeministër, kurse klinika speciale varej nga Ministria e Shëndetësisë. Kështu që te ne aplikoheshin të njëjtat paga dhe i njëjti sistem si për të gjitha poliklinikat e vendit. Mjeku në Bllok nuk kishte rrogë më të lartë, por sipas skemave që ishin në atë kohë për të gjithë mjekët”, u shpreh Kalo.