Këshilli i Emërimeve në Drejtësi ka përzgjedhur katër emra si kandidatë potencialë për plotësimin e vakancave në Gjykatën Kushtetuese, e mbetur me vetëm 1 anëtar nga 9 që duhet të ketë.
Ata janë prokurori i Krimeve të Rënda, Besnik Muçi, gjyqtarja e Tiranës, Regleta Panajoti dhe dy këshilltaret ligjore Arta Vorpsi dhe Fiona Papajorgji.
KED lejoi kandidimin e tyre pasi nuk konstatoi probleme gjatë verifikimit rigoroz dhe të thelluar të kryer për pasurinë, integritetin dhe kushteve ligjore të kandidimit. Pas kalimit me sukses të kësaj faze, të përzgjedhurit do t’i nënshtrohen pikëzimit dhe renditjes përfundimtare nga KED për vendet vakante të shpallura nga Presidenti i Republikës dhe nga Kuvendi.
Të njëjtin fat nuk e patën pesë pretendentë të tjerë për karriget e Kushtetueses për të cilët u ndalua kandidimi. Mes tyre ishin gjyqtarët e Tiranës, Anila Guri (Kristani) dhe Ilir Mustafaj, të cilët u shkarkuan nga vettingu. Në të njëjtën mbledhje, KED lejoi kandidimin e gjyqtarit të Apelit Administrativ, Artur Malaj, për vendin vakant të Inspektorit të Lartë të Drejtësisë, institucioni që do të hetojë disiplinarisht gjyqtarët dhe prokurorët, ndërsa i mbylli derën kandidatëve Altin Hazizajt dhe Mimoza Qinami.
A2CNN mësoi se KED do të nisë procesin e pikëzimit dhe renditjes së kandidatëve, pasi të përfundojë verifikimi edhe për dy kandidatë për Kushtetuesen dhe një tjetër për Inspektorin e Lartë të Drejtësisë.
