Plas në Kavajë, protestuesit përleshen me policinë, Redjan Krali nuk hyn dot në zyrë

Protestuesit që ndodhen përpara godinës së Bashkisë Kavajë janë përplasur me policinë dhe kanë ndaluar që kryebashkiaku i ri Redjan Krali dhe prefektja e Tiranës Suzana Jahollari kanë dashur që të hyjnë brenda.

Që prej mëngjesit të sotëm, Isa Sakja, kryetari aktual ndodhet brenda në godinën e Bashkisë dhe pretendon se nuk do të lërë zyrën e tij.

Mbështetësit e PD-së thërrasin në kor emrin e Isa Sakjas, ndërkohë që prefektja Jahollari pretendon se ka në dorë dokumente ligjore, që urdhërojnë nxjerrjen jashtë të kryetarit demokrat të Kavajës.

“Ne kërkojmë që Isa Sakja të lërë zyrën e Bashkisë, kërkuam të hynim në godinë së bashku me dokumentet ligjore, por nuk u lejuam”, është shprehur Jahollari.

Ceremonia e betimit të kryetarit të ri të Bashkisë së Kavajës u krye sot në zyrën e prefekturës, për të shmangur incidentet e mundshme në godinën e Bashkisë. Në zonë ka pasur sot një prani të madhe të policisë, ndërsa nuk dihet sesa do të vijojë qëndresa e Sakjas.