Plas në Devoll, kryebashkiaku i PD nuk pranon të lirojë zyrën: 30 qershori është shfuqizuar, do mbroj Kushtetutën

Konstituimi i Këshillit Bashkiak në Devoll ka nisur me tensione në Bashkinë e Devollit.

Kryetari aktual i Bashkisë, i zgjedhur nga Partia Demokratike, Bledion Nallbati, është shprehur se nuk do të lirojë zyrën pasi sipas tij 30 qershori nuk është i ligjshëm.

“Ne po vijojmë punën. Nuk ka pasur zgjedhje. Populli i abandonoi. Ishin zgjedhje të PS. Bashkia po uzurpohet. Ne zbatojmë dekretin e Presidentit. 30 qershori është shfuqizuar. Do mbrojmë Kushtetutën. Nuk ka kryetar të ri, as këshill të ri. Kryetarët vijnë dhe ikin me zgjedhje. Nëse bashkia pushtohet do t’i ndalojmë dhe procedojmë pranë prokurorisë”, deklaroi Nallbati.

Sot do të testohet për herë të parë qendrimi i prerë i Lulzim Bashës dhe aleatëve të opozitës së bashkuar për të mos liruar zyrat. Sot Kolegji Zgjedhor i jep zyrtarisht mandatin Eduart Duros, kandidatit të PS, ndërkohë që pritet aksioni i opozitës për të penguar nisjen nga puna.