Policia e Shkodrës ka arrestuar ditën e sotme shtetasin Skënder Daija pasi akuzohet se ka plagosur në vitin 2016 biznesmenin Syri Mehmetaj.
Ngjarja ka ndodhur më 26 dhjetor 2016 dhe prej tre vitesh autori Daija ishte në arrati.
Policia bën me dije se tre vite më parë në lagjen “10 Korriku” në Rotondon e Shkodrës, Daija ka tentuar të vrasë me armë zjarri me silenciator Syri Mehmetajn.
Ai ndodhej me gruan në makinë kur u qëllua dhe ka qenë kjo e fundit që e ka dërguar atë me urgjencë në spital.
NJOFTIMI ZYRTAR I POLICISE
Një tjetër person në kërkim në prangat e policisë
Kapet dhe ndalohet një person i shpallur në kërkim për tentativë vrasjeje, autor i ngjarjes së ndodhur më datë 26.12.2016, si dhe arrestohet një person tjetër për përkrahje të autorit të krimit.
Nga Strukturat e Drejtorisë Vendore të Policisë në bazë të informacioneve të marra në rrugë operative dhe pas një pune të mirëorganizuar në lagjen “Daniel Matlia”, Shkodër, është bërë kapja dhe ndalimi i shtetasit në kërkim:
S.D, 30 vjec, banues në lagjen “10 Korriku”, Shkodër;
Kapja dhe ndalimi i tij u bë pasi Gjykata e Rrethit Gjyqësor Shkodër, në vitin 2017, ka vendosur masën e sigurisë “Arrest në burg” për veprën penale “Vrasje me paramendim, mbetur në tentative” dhe “Prodhimi dhe mbajtja pa leje e armëve”.
Ky shtetas më datë 26.12.2016, tek rrethrrotullimi në dalje të unazës lindore të qytetit Shkodër, ka tentuar të vrasë me armë zjarri shtetasin S.M, duke e lënë të plagosur rëndë.
Gjithashtu u arrestua në flagrancë shtetasi A.Ç. 31 vjeç, banues në Shkodër, për veprën penale “Përkrahja e autorit të krimit”.
Materialet iu referuan Prokurorisë së Rrethit Gjyqësor Shkodër për veprime të metejshme.
