Pak minuta pas vendimit të Gjykatës së Shkallës së Parë Durrës që rrëzoi kërkesën e kandidates së PS Valbona Sako për t’i dhënë mandatin e kryebashkiakes pas zgjedhjeve të 30 qershorit, mësohet se edhe Gjykata e Tiranës ka refuzuar t’i japë mandatin kandidatit të PS në Bashkinë e Vorës Agim Kajmaku.
Kërkesës së kandidatit socialist Agim Kajmaku, Gjykata e Tiranës i është përgjigjur se kjo çështje është kompetencë e Gjykatës Administrative.
Vendimi i cili mban datën 15 korrik 2019, sipas Gjykatës së Tiranës, mund të apelohet në Gjykatën e Lartë brenda pesë ditëve.
Më herët ishte Gjykata e Durrësit që refuzoi të konfirmojë mandatin e Valbona Sakos me argumentin se Bindja Demokratike, forca politike rivale e PS në këto zgjedhje, është regjistruar në KQZ në shkelje me afatet ligjore.
