Pakti me opozitën për mbrojtjen e Teatrit, regjisori Budina tregon pse nuk e firmosi

Regjisori i njohur Edmond Budina ditën e djeshme vendosi të mos e firmosë kontratën e hartuar nga Partia Demokratike, në të cilën opozita zotohej se do të mbronte mbrojtjen e godinës së Teatrit Kombëtar nga shembja si edhe dhënien e statusit “Monument Kulture” kur të vijë në pushtet.

Me gishtin e drejtuar ndaj kreut të opozitës dhe lutjen për ta parë në sy, Budina kishte vetëm një kërkesë për opozitën: Mos na tradhtoni. Një ditë pasi ishte përballur me dhunën e Policisë në mbrojtje të Teatrit dhe pas orëve të gjata në ruajtje të godinës, Budina deklaroi në skenën e Teatrit se s’ka vend për protagonizëm dhe se zotimi është mes opozitës dhe popullit.

“E përshëndes këtë kontratë të sotme, e gjej me shumë vend dhe nesër kur opozita me PD-në të jetë në pushtet, kjo kontratë duhet të materializohet. Unë përpara të gjitha gjërave dua ta shikoj në sy kryetarin e PD-së. Të marr një premtim, po premton para popullit, ne që firmosim nuk jemi asgjë, jemi askushi po të mos ishte populli. Nëse nesër nuk ju nuk do të realizoni ato që keni shkruar, unë i pari do jem kundër jush. E lexova kontratën, e dëgjova edhe sot. Ka një gjë tani: ose kjo kontratë firmoset nga të gjithë ju, se 5 veta më duket pak absurde. Nëse nuk e firmosim të gjithë, nuk e firmos, jam me ju. Përse e them këtë? Këtu nuk ka protagonistë, këtu është populli që ka marrë fuqinë në dorë. Pra, kjo është një kontratë simbolike që e firmos kreu i PD-së me popullin. Unë jam me ju. Mos na tradhtoni. Mos na tradhtoni”, tha Budina, duke marrë duartrokitjet e artistëve dhe qytetarëve. Artistët që hodhën firmën në kontratën e hartuar nga Partia Demokratike u shprehën besimplotë se godina do të ruhet dhe do të restaurohet për t’i dhënë vlerën e vërtetë që ajo ka.