Nuk ndalet Meta, flet për arrestimin e tij dhe fton njerëzit të lexojnë artikullin që shan Ramën: Më vonë do kënaqeni kur t’ju tregoj se…

Ditën e sotme Presidenti Meta e ka nisur me një reagim në rrjetet sociale ku shkruan se po udhëton drejt Tropojës por më vonë kur të jetë i lirë do shkruajë dhe do tregojë se pse sot pas 3 vitesh nuk ka asnjë anëtar të Gjykatës Kushtetuese.

Ai ka shpërndarë një artikull të gazetës “Koha Jonë” ku goditet kryeministri Rama, shkrim i cili mban titullin “Gjykata e Lartë drejt uzurpimit nga Kryeministri.

Presidenti gjithashtu i është përgjigjur edhe zërave për arrestimin e mundshëm të tij duke ironizuar se “Sapo kaloi dhe Spaçin.”

STATUSI I PLOTE I PRESIDENTIT ILIR META

Mirëdita të dashur miq!

Duke udhëtuar drejt Tropojës sapo përfundova leximin e shtypit për sot. Ndaj ju ftoj edhe ju që të lexoni me vëmendje një shkrim i cili ndihmon për të kuptuar si funksionon shndërrimi i Reformës Historike të Drejtësisë të 21-22 korrikut në Ramaformë. Më vonë, kur të jem më i lirë që të shkruaj me terezi do kënaqeni kur t’ju tregoj se pse sot pas tre vitesh nuk keni asnjë anëtar të Gjykatës Kushtetuese. Askush më mirë se unë nuk ua tregon dot, jo se jam ndonjë tregimtar i madh, por për shkak të detyrave të larta edhe si ish-Kryetar i Kuvendit e si President i Republikës. Të jeni të sigurt se fajin nuk e ka Reforma e bërë me 140 vota në Kuvend tre vjet më parë, por transformimi i saj në Ramaformë bashkë me një kor të strukturuar ndërkombëtar që nuk do të pranojë bashkëfajësinë për këtë dështim që po e vuajnë qytetarët, ekonomia dhe biznesi. Shpresoj që këto “arritje” të Ramaformës të mos i mësojnë Profesorët e nderuar të Komisionit Venecias, të paktën gjatë verës, se më e pakta do kalojnë në gjendje të fikti, përveçse s’do e kuptojnë kurrë pse duhet të punonin e studionin për mëse një vit me intensitet aq të lartë e të vinin e të iknin shumë herë kur këtë Ramaformë mund ta kishte mbyllur z.Agaci për një javë dhe disa miq të inamoruar pas reformës të brohorisnin “È buono per l’Albania”.

E di që disa do thonë se kam frikë nga Reforma në Drejtësi e sidomos nga Spaku. Pa merak për të gjithë sepse sapo kalova edhe Spaçin. Kalofshi bukur sot të gjithë.

Linku i artikullit për Ramën: https://www.kohajone.com/2019/07/05/gjykata-e-larte-drejt-uzurpimit-nga-kryeministri/?fbclid=IwAR3NtGKHZ_pSembjCGr6Jo8K4Vq2wjoW7d1FBi-r63vv7XZ-KTUVYBpwTFs