Mblidhet Komisioni Hetimor për shkarkimin e Metës, kush do të jetë sekretarja

Ditën e sotme është mbajtur mbledhja e parë e Komisionit Hetimor për shkarkimin e presidentit Ilir Meta.

Kjo mbledhje u drejtua nga kryetari Ulsi Manja.

Ndërkohë u vendosën dhe rolet që do të kenë deputetët.

Kështu sekretarja e këtij komisioni mësohet se do të jetë deputetja e PS Klotilda Busha dhe bashkërelatorë Alket Hyseni dhe Halit Valteri.

Kryetari i Komisionit deklaroi se deri në mbledhjen e ardhshme dy bashkë-relatorët duhet të përgatisin një projekt rregullore dhe plan paraprak për punën e këtij komisioni.

Hapi i parë i këtij komisioni që do të ndërmerret do të jetë ngritja e një sekretariati teknik që do punojë edhe gjatë muajit gusht.

Kujtojmë se në seancën e fundit plenare Kuvendi miratoi me 101 vota pro ngritjen e Komisionit të Posaçëm Hetimor për shkarkimin e Presidentit Ilir Meta, me arsyetimin se kreu i shtetit ka shkelur Kushtetutën me çdekretimin e 30 qershorit.

Komisioni do të zgjasë tre muaj, përbëhet nga  9 anëtarë, 5 nga PS dhe 4 nga opozita e re, ndërsa drejtohet nga kryetari i Komisionit të Ligjeve, Ulsi Manja.