Mandati i Durrësit, Kryemadhi: Ja çfarë duhet të bëjë KQZ pas vendimit të sotëm të Gjykatës

Për vendimin e Gjykatës së Durrësit, e cila e ka bërë nul procesin zgjedhor të 30 qershorit në bashkinë e dytë më të madhe në vend, ka reaguar edhe kryetarja e LSI, Monika Kryemadhi.

Përmes një postimi në rrjetet sociale, Kryemadhi shkruan se ky vendim i Gjykatës provon edhe një herë tjetër se procesi i 30 qershorit ishte nul dhe asgjë më shumë.

Sipas numrit një të LSI tashmë KQZ duhet të pushojë ccdo vendim, pasi u provua nga Gjykata se 30 qershori ishte i pavlefshëm si proces zgjedhor normal.

Më poshtë postimi i plotë i Monika Kryemadhit:

Nul!
Pavlefshmëri absolute!

Thjesht e saktë pa tambure politike. Vendimi i Gjykatës së Durrësit vetëm teknikisht tregoi se që në krye të herës, që në hapin e saj të parë procedural e administrativ, atë të regjistrimit të subjekteve zgjedhore KQZ ka shkelur hapur Kodin Zgjedhor dhe ligjin për partitë politike, dhe gjithë veprimtaria e vendimmarrja e saj rezulton në shkelje të hapur të Kodit të Procedurave Administrative.

Që pas këtij momenti çdo vendim i KQZ është nul. Pavlefshmëria absolute e aktit administrativ sjell pavlefshmëri absolute të të gjithë procesit në vijim.

Gjithçka konsiderohet nul.
A mund të diskutohet tani mbi diçka që nuk ka sjellë asnjë pasojë juridike??

Nul i gjithë procesi.
Zgjedhje nuk ka patur.

E vetmja pyetje tani që mbetet të bëhet është: Kush do të mbajë përgjegjësi tani për të gjithë dëmin ekonomik, juridik, moral, të krijuar nga veprimtaria e paligjshme e KQZ?

I bëj thirrje Prokurores së Përkohshme të fillojë menjëherë çështjen penale për “Shpërdorim detyre” në ngarkim të anëtarëve të KQZ .