Lëvizje 360 gradë, zbardhen porositë e Ramës për deputetët socialistë

Një ditë pas konferencës së presidentit Ilir Meta i cili foli me tone të ashpra në drejtim të qeverisë, kryeministri Edi Rama ka mbledhur sot kryesinë e Partisë Socialiste.

Mbledhja ka zgjatur rreth 90 minuta dhe mësohet se Rama ka diskutuar me deputetët dhe anëtarët e tjerë të kryesisë për hapat e mëtejshëm të shkarkimit të Ilir Metës nga posti i presidentit.

Rama nuk i ka komentuar ende deklaratat e presidentit Meta, i cili foli edhe për një ‘grup të strukturar’ që punon kundër interesave të Shqipërisë, ku nuk la pa përfshirë kryeministrin shqiptar dhe miliarderin George Soros.

Sa i përket vendimeve në mbledhje, Kryesia ka vendosur që të thërrasë Asamblenë e PS në fund të muajit korrik.

Ndërkohë që Rama, bëjnë me dije burimet, ka kërkuar të bëhet analiza e rezultatit të votimeve të 30 qershorit, ku Partia Socialiste mori 60 nga 61 bashkitë e vendit për shkak të faktit se opozita nuk iu bashkua garës.