Në kutitë e votimit në Urën Vajgurore, Malësi të Madhe dhe Divjakë ka vota më shumë sesa votues kanë votuar. Dhe kjo, sipas vetë të dhënave të Komisionit Qendror të Zgjedhjeve. Në tabelat përfundimtare të KQZ-së pas mbylljes së votimit të dielën në orën 19.00, është shkruar edhe numri i zgjedhësve që kanë votuar si edhe përqindja përkatëse. Por sot, në këto tre bashki, pas shpalljes së fituesve përkatës, rezultojnë më shumë vota. Nëse ky është një gabim teknik i përllogaritjes së KQZ-së ende nuk është sqaruar. Por në proceset e tjera zgjedhore vështirë se është vënë re diçka e ngjashme.
Ura Vajgurore
Në Bashkinë e Urës Vajgurore kandidonte Juliana Mema. Të dhënat zyrtare të KQZ-së, në këtë bashki tregojnë se kanë votuar 5900 qytetarë, ose 19.18 për qind. Por në tabelën ku shfaqet se me sa vota ka fituar kjo kandidate, rezulton se ajo është shpallur fituese me 7666 vota. Dhe, këtu kemi një diferencë prej 1766 votash.
Malësi e Madhe
Në 80 nga 80 kutitë e numëruara për këtë bashki, kandidati socialist Tonin Zef Marinaj ka fituar 94.04 %, ose 7772 vota. Ndërsa kandidati rival Pjerin Palok Spathari 5.96%, ose 493 vota. Pra, të dy në total, kanë marrë 8265 vota. Por në listën pas përfundimit të votimit dje të KQZ-së, për këtë bashki figuronin se kishin votuar 7600 zgjedhës, ose 665 zgjedhës më pak.
Divjakë
Në të dhënat zyrtare të KQZ-së, deri në mbyllje të votimit i janë përgjigjur thirrjes për të votuar 13.000 qytetarë. Ndërsa në rezultatet, pas përfundimit të numërimit sot, Fredi Kokoneshi i Partisë Socialiste, rezulton të ketë fituar me me 13513 vota. Pra, ka një diferencë “enigmatike” prej 513 votash.
Bashkia e Vorës
Edhe në Bashkinë Vorë ka një mospërputhje mes numrit të votuesve dhe votive që ka fituar kandidati socialist Agim Ymer Kajmaku. Ai rezulton të ketë fituar me 6,208, ndërkohë që në listën e votuesve mbrëmë KQZ shkruante se për Bashkinë e Vorës kishin votuar 6120 votues.
Në Berat dy kandidatët e tjerë të Ervin Demos, Plarent Aleksi dhe Pavlo Shkarpa kanë marrë gjithsej 1726 vota. Edhe pse procesi i numërimit nuk ka mbaruar ende rezultojnë 2166 vota më shumë sesa numri i votuesve. Në Bashkinë e Vaut të Dejës, ku ka vetëm një kandidat fituesi ka 1057 vota më shumë se votuesit e deklaruar nga ana e KQZ-së. Në Lushnjë rezulton se kandidati i PS-së ka 843 vota më shumë se numri i votuesve i deklaruar nga KQZ. Diferenca votash ka edhe në Vorë.
Kandidatët fitues
Bashkia Berat
14000 votues
14,570 fituesi (pa u mbyllur 8 QV
1724 kandidatët e tjerë
2166 vota më shumë
Bashkia Lushnjë
27243 votues
28,086 kandidati fitues
843 vota më shumë
Vau Dejës
5166 votues
6,223 fituesi
1057 vota më shumë
Gramsh
8947 votues
9076 vota dy kandidatët
129 vota më tepër / Burimi: Gazeta Si
