Sot në zyrat e PD ka mbërritur kërkesa e prokurorëve belg për kreun e demokratëve për të dëshmuar në lidhje me çështjen trafikimin e 3.4 milionë eurove të padeklaruara, që u kapën gjatë hyrjes në portin e Durrësit rreth një vit më parë.
Pas kësaj kërkese, kreu i Partisë Demokratike Lulzim Basha është i gatshëm të bashkëpunojë me prokurorët belgë që kanë mbërritur sot në Shqipëri.
Disa zëra nga PD thonë se Lulzim Basha, ka shprehur gatishmërinë e plotë të kontribuojë në hetimin e autoriteteve të drejtësisë belge për dosjen e njohur si “Toyota Yaris”, ku u kapën 3.4 milionë euro.
Vlen të përmendet se Basha foli për këtë çështje për herë të parë nga foltorja e Parlamentit, duke lëshuar akuza të ashpra në drejtim të kreut të grupit socialist, Taulant Balla.
