I dënuar me burgim të përjetshëm për vrasje, arrestohet 49-vjeçari nga Durrësi (EMRI)

Ditën e sotme Policia e Durrësit ka vënë në pranga një 49-vjeçar i cili ishte shpallur në kërkim ndërkombëtar për vrasje dhe ishte dënuar me burgim të përjetshëm nga një gjykatë në Itali.

Mësohet se i arrestuari është shtetasi Ermir Dervishi i cili ka vrarë në vitin 1998 Gentian Duron në Itali.

Arrestimi i tij është bërë me qëllim ekstradimin në shtetin fqinj.

NJOFTIMI ZYRTAR I POLICISE

Forcat e Posaçme Operacionale në Drejtorinë Vendore të Policisë Durrës, në bashkëpunim me Interpol Tirana dhe me Zyrën e Interforcës të Policisë italiane, pas informacioneve të mara dhe një pune të mirëorganizuar, arrestuan përkohësisht me qëllim ekstradimin drejt Italisë, shtetasin shqiptar të shpallur në kërkim ndërkombëtar:

• Ermir Dervishi, 49 vjeç, banues në Durrës.

Shtetasi Ermir Dervishi ishte i shpallur në kërkim ndërkombëtar, pasi Gjykata e Apelit të Alessandrias, në datën 18.02.1999 e ka dënuar me burgim të përjetshëm, për kryerjen e veprës penale “Vrasja”.

Materialet hetimore i kaluan Prokurorisë Pranë Gjykatës së Shkallës së Parë Durrës për veprime të mëtejshme.