Hetoi Llallën dhe Shpëtim Gjikën, konfirmohet në detyrë Prokurori i Krimeve të Rënda, gati për në SPAK

Ditën e sotme është konfirmuar në detyrë prokurori i Krimeve të Rënda Klodian Braho, njëkohësisht kandidat në Strukturën e Posa çme Kundër Korrupsionit dhe Krimit të Organizuar (SPAK).

Komisioni i Pavarur i Kualifikimit ka konfirmuar Brahon, i cili u përball sot me trupën e përbërë nga Xhensila Pine, Valbona Sanxhaktari dhe Roland Ilia.

Klodian Braho ka mbaruar Shkollën e Magjistraturës në vitet 2005-2008 dhe më pas është emëruar prokuror në Berat. Në vitin 2012, Braho u transferua në Prokurorinë e Vlorës ku mbajti edhe postin e zv.drejtuesit, ndërsa në vitin 2015 u dekretua në Prokurorinë e Krimeve të Rënda.

Paralelisht me punën si prokuror, Braho është angazhuar edhe në mësimdhënie apo si ekspert në Shkollën e Magjistraturës. Ai u kualifikua nga Këshilli i Lartë i Prokurorisë mes kandidatëve për SPAK dhe me vendimin e formës së prerë nga institucionet e vetingut, Braho e ka rrugën e hapur.

Analiza e pasurisë është një ndër tre shtyllat e rivlerësimit për prokurorët, së bashku me kontrollin e figurës dhe vlerësimin e aftësive profesionale.

Braho ka pasur në dorë dosje ‘të nxehta’ të drejtësisë, si ajo e ish-prokurorit të Përgjithshëm Adriatik Llalla dhe ish-kryebashkiakut të Vlorës Shpëtim Gjika.