Habit deputeti i ri opozitar: Do kërkoj hapjen e dosjeve për pasuritë e Ilir Metës

Një nga deputetët e dalë nga listat fundore të PD në vend është edhe Halit Valteri, i cili prej disa muajsh është pjesëtarë i Kuvendit të Shqipërisë.

Valteri është i njohur për kritikat kundër Presidentit Ilir Meta, ndërsa në emisionin ’45 Minuta’ në Report Tv, ka shkuar më te. Në këtë emision ai ka deklaruar se ditën e hënë do t’u drejtojë një kërkesë të gjitha institucioneve për informacion si ka ndryshuar pasuria e kreut të shtetit nga viti 1990.

“Ilir Meta e ka humbur të drejtën që të jetë Presidenti i shqiptarëve, pasi bashkë me bashkëshorten drejton opozitën. Ka një krizë personale, të politikanëve, që për ego personale e kanë futur vendin në një çark. Presidenti ka shkelur Kushtetutën, do i analizojmë faktet dhe do ia çojmë Kushtetueses. Mendoj që të hënën nis punën komisioni. Që të hënën do i drejtoj një letër çdo institucioni, si ka ndryshuar pasuria e Ilir Metës dhe familjes së tij që nga viti 1990.

Do të bëj kërkesë, pasi jam deputet dhe e kam të drejtë ligjore, do ua pasqyroj me fakte dhe shifra shqiptarëve. Kush janë pasuritë e deklaruara dhe të padeklaruara, se shqiptarët i dinë. Vota ime është pro shkarkimit të Presidentit. Do të bashkoj votat me shumicën çdo herë që është në të mirë të shqiptarëve” tha ai.