Detaje të reja kanë dalë nga shpërthimi i fuqishëm në zonën e Ish-Bllokut që tronditi kryeqytetin pak minuta më parë.
Numri i të plagosurve ndërkohë ka shkuar në 4, ndërmjet të cilëve janë tre vajza dhe një djalë.
Shpërthimi ka ndodhur në një dyqan tullumbacesh që organizonte eventet për fëmijë.
Tre vajzat e plagosura mësohet se ishin të punësuara në dyqan ndërsa djali i plagosur ndodhej në argjendarinë ngjitur.
Ende nuk dihet gjendja e tyre shëndetësore.
Shpërthimi ishte mjaft i fuqishëm, saqë është dëmtuar edhe argjendaria ngjitur. Janë thyer xhamat e argjendarisë, ndërsa në rrugë janë shpërndarë edhe copëza betoni dhe objektesh pas shpërthimit me eksploziv. Janë dëmtuar edhe disa biçikleta me GPS që përdoren nga të rinjtë në Tiranë, ndërsa për të shmangur rrezikun policia e Shtetit ka evakuuar të pranishmit, pasi në dyqan ka edhe bombola të tjera me helium.
Forcat e policisë dhe ato zjarrfikëse kanë mbërritur në vendin e ngjarjes në rrugën “Vaso Pasha”.
Në vendin e ngjarjes mbërriti edhe Rebani Jaupi, drejtori i Policisë së Tiranës.
