Partia për Drejtësi Integrim dhe Unitet e Shpëtim Idrizit prej gati dy vitesh është rreshtuar në Opozitë. Shpëtim Idrizi pasi la Ramën dhe Mazhorancën, ose më saktë u zbua nga ky i fundit pasi nuk ia kishte më nevojën, firmosi kontratën me PD dhe Lulzim Bashën.
Që nga ky moment Idrizi ka qenë në krahë të Bashës në kauzat e Opozitës. Në protesta, takime edhe në kauzën madhore të muajve të fundit për ta dalë nga sistemi dhe të kërkuarit e largimit të kryeministrit Rama.
Por siç e ka bërë zakon tashmë që ta dredh kur i leverdis, Shpëtim Idrizi duket se nuk e ka lënë huqin e tij edhe këtë herë. Ishte kryetari i Rrogozhinës, Beqir Nuredini që dha sinjalin e parë se Idrizi po përgatitet ta braktisë Bashën në Opozitë.
Ky i fundit i habiti të gjithë ditën e hënë kur vendosi t’ia dorëzojë postin kryetarit të ri të Bashkisë dalë nga zgjedhjet vendore të 30 qershorit, me një buzëqeshje dhe përqafim, duke u shprehur se nuk do të përplaset me njerëzit e qytetit të tij për një karrige.
Nuredini është shfaqur i buzëqeshur në momentin që i dorëzoi zyrën kryetarit të ri socialistit Haxhi Memolla dhe i uroj suksese në mandatin e tij katër vjeçar.
Po vendimi i Opozitës për të mos i njohur votimet e 30 qershorit dhe mos lëshimin e zyrave ku shkoi këtë herë?
Nuredini në fakt nuk dha shumë shpjegime politike për veprimin e tij, duke thënë se si bashkëqytetar i Rrogozhinës nuk do i përplaste qytetarët e tij. Pra në këtë vendim që nuk duket personal i Beqir Nuredinit duket se fillon tradhtia e radhës e Shpëtim Idrizit. Nuredini përveçse politikan, në Tiranë njihet edhe si biznesmen, që sëfundmi është futur edhe në tregun mediatik, duke blerë një nga gazetat kryesore në vend mund të jetë joshur ekonomikisht.
Fundja cili do të ishte ai i pasur në Shqipëri që do të refuzonte të futej në shpurën e kryeministrit Rama, ku dihet që përfitimet janë më shumë se të majme. Apo ndoshta kjo ofertë e Ramës ka shkuar në drejtim të shefit të tij politik, Shpëtim Idrizi pasi fundja ky i fundit i ka më të lehta kapërcimet, siç koha ka treguar.
Nëse PDIU do kalojë nga Partia Socialiste, duke braktisur Partinë Demokratike do ishte një tjetër provë se kjo parti është rrënuar. Pas abandonimit nga deputetët e zgjedhur me siglën e saj dhe ky kryetar bashkie, braktisja e çështjes çame, kjo parti del nga çdo linjë morale, ose siç populli shqiptar e thotë troç, po shkon për lesh…/Fast News Albania
