Kreu i PD ka vijuar takimet e sotme me bazën elektorale të partisë së tij. Në takimet me mbështetësit e PD-së, Basha ka përsëritur fjalën e tij se protestat do të vijojnë të jenë europiane dhe nuk janë për pushtet personal.
“Protestat tona janë evropiane dhe për Shqipërinë si gjithë Europa. Edhe mediat ndërkombëtare, së fundmi, na u drejtuan si ‘protestuesit pro-europianë’. Meritë të jashtëzakonshme për këtë ka bashkimi i qytetarëve, që ka ngjallur shpresën për ndryshim”, theksoi Basha.
Duke vënë dukje gjendjen shumë të vështire ekonomike të qytetarëve të zakonshëm, lideri i opozitës tha se PD duhet t’i dalë për zot vendit, të rrisë mbështetjen e saj tek ai 85 përqindësh që refuzuan regjimin e Edi Ramës, duke treguar se PD, njësoj si ata, kërkon ndryshimin e vërtetë.
“Kjo nuk është një betejë për pushtet personal. Nuk jemi në betejë për karriget tona, por për të mbrojtur interesin publik, për ndryshimin rrënjësor të sistemit, që e keqja që solli Edi Rama, të mos përsëritet më kurrë”, tha Basha. Ai theksoi se qëllimi i këtij ndryshimi është mirëqenia e qytetarëve.
