Basha pret në zyrë ish-kryeministrin e Kanadasë, plan për mbështetjen e PD

Kryetari i Partisë Demokratike, Lulzim Basha është takuar sot në zyrën e tij me Presidentin e International Democrat Union, Stephen Harper. Ky i fundit ka qenë dhe kryeministër i Kanadasë dhe sipas Bashës është një mbështetës i Shqipërisë në rrugën e saj euro-atlantike duke ruajtur standardet e demokracisë.

Kreu i PD thotë ndër të tjera në postimin e tij në rrjetet sociale, se e mirëpret një bashkëpunim në të ardhmen me IPU për ta asistuar PD në krijimin e një programi sa më të mirë për Shqipërinë.

“Nder dhe privilegj të takohem në Tiranë me mikun e çmuar Stephen Harper , Presidentin e International Democrat Union , ish-kryeministër i Kanadasë dhe një ndër zërat më të spikatur të së djathtës në mbarë botën. Bashkë diskutuam për krizën e rëndë politike dhe kushtetuese ku është futur vendi si edhe për rrugëdaljen prej saj që duhet të kalojë përmes mbrojtjes së standardeve të demokracisë dhe të shtetit ligjor.

Si një ndër përkrahësit më të vyer të integrimit Euro-Atlantik të Shqipërisë, i shpreha mirënjohjen time për mbështetjen e tij të vazhdueshme që Shqipëria të përmbushë standardet e demokracisë dhe shtetit të së drejtës si garancia e vetme për integrimin tonë në BE.

Partia Demokratike e Shqipërisë dhe unë e mirëpresim bashkëpunimin e mëtejshëm në kuadër të organizatës botërore të IPU që përfshin partitë e djathta dhe të qendrës së djathtë me seli në Munih, ku aderojmë prej vitesh.”- shkruan Basha në facebook.