Balla flet për shkarkimin e Metës: Ndjej keqardhje njerëzore..

Kryetari i grupit parlamentar të Partisë Socialiste, Taulant Balla ka folur edhe një herë tjetër për procedurën e ngritur për shkarkimin e presidentit Meta. Balla ka folur në një intervistë për neës 24 se Meta e ktheu në një rezidencë të përkohshme të opozitës dhe se për këtë gjë ai ndjen keqardhje.

Sipas tij, deputetët po zbatojnë Kushtetutën dhe do ndjekin të gjitha hapat e nevojshëm për ta arritur te shkarkimi i Presidentit.

“Shkelja e bërë nga Presidenti minimalisht duhej hetuar. Janë 55 deputetë që kërkojnë shkarkimin, kërkesa duhet çuar deri në fund. Unë kryesoj listën e 55 deputetëve, jam në ushtrim të drejtë të asaj që njeh Kushtetuta. Duhet më shumë se ¼ e deputetëve për të iniciuar shkarkimin dhe të gjithë biem dakord se akti i Presidentit e shndërroi Presidencën në një rezisdencë të përkohshme të opozitës, në seli të opozitës”,- tha Balla.

Balla shtoi ndër të tjera, se ndjen keqardhje për Presidentin, për retorikën e përdorur nga ky i fundit.

“Në aspektin personal kam pasur mundësi ta njoh dhe të punojmë bashkë. Ndjej keqardhje njerëzore për atë degradim të pakuptueshëm të retorikës së tij të komunikimit. Presidenti me aktet e bëra duhet ta lirojë atë zyrë. Ai komunikim publik dhe ky që vijon çdo një orë tregon se ai është larg të qenit President, ngjan si gaztor cirku që argëton të tjerët”,- shtoi ai.